1985 නොවැම්බර් 6 වනදා දහවල් 11.35 ට පමණ කොලොම්බියාවේ වාමාංශික කැරලිකාර සංවිධානයක් වූ අප්‍රේල් 19 ව්‍යාපාරය හෙවත් M-19 සංවිධානය එරට බොගොටා අගනුවර අධිකරණ මන්දිරයට පහර දී අල්ලාගත්තා. ඇමරිකාව සහ කොලොම්බියාව අතර උද්දර්පණ නීතිය ව්‍යවස්ථානුකූල ද යන්න පිළිබඳ ඒ වනවිට එරට ශ්‍රේෂ්ඨාධිකරණය විසින් සලකා බැලෙමින් තිබුණා. එහි තීන්දුව ලබාදීමට නියමිතව තිබුණේ එදින යි. මේ නීතිය සම්මත වී නම් ඇමරිකාවට සහ කොලොම්බියාවට තමන්ට අවශ්‍ය අපරාධකරුවන් හුවමාරු කරගත හැකි වනවා. එස්කොබාර් බිය වූයේ, මෙම නීතිය බලාත්මක වූ දිනෙක, කොලොම්බියානුවන් විසින් තමන් අත්අඩංගුවට ගතහොත් ඇමරිකාවට බාර දෙනු ඇති බවයි. එස්කොබාර් ජීවිත කාලය පුරාවට වැඩියෙන්ම බියෙන් සිටියේ ඇමරිකාවට තමුන් බාර දෙනු ඇත යන්න පිළිබඳව බව කියනු ලබනවා.
